بقلم/عبدان دهيس -
خلوا.. فتاويكم لكم: رفقاً.. بـ«القوارير»!!
بعد هذا وهاذاك .. شوه عادهم «يبوا» شيوخ الفتاوى من جماعة «بتوع ربنا».. اللي يفتوا بها حول «النسوان والحريم».. فاللي جاء في القرآن والسنة» واضح ومفهوم للي يفهم واللي مايفهم.. «الشرطم البرطم».. أن المرأة مثلها مثل الرجل.. في الحقوق والواجبات.. وفي الخير والشر- خلاص.. خلوه يفتهم لكم - عيب كثرتوا بالفتاوي والبلاوي. يوم فتوى على «حلب ضرع البقرة»- لا تمسكي يا حرمة «ضرعها».. بعدين بايدخل «الشيطان الميطان» وشوه اللي با يخارجنا من كلام الناس.. بايقع «طلاق» بالثلاث.. ويوم على «أير الثور»- غطوا عيونكم يا «نسوان»- لأن اللي قداكم «حيوان ذكر».. مش من جنسكم.. بعدين بايقع «حيش بيش».. أخزوا شيطان الرجيم.. ابعدوا «المزناوة» من عيونكم.. وساعة يجيبوا لنا فتاوى على الموز».

ومرة على «الجزر والخيار» وحرام تمسكه «النسانه» من «الطرف».. أو حتى تشتريه من أساسه أو توكلها بـ«حلقها» البعض يسميه «حلق» والبعض فم».. نخاف تحملوا في «حلوقكم».. بعدين بايقع يا فضيحتاه.. وسؤال وجواب.. منوه «أبوه» .. ومنوه «أمه» أبوه« الجزر» وإلا «الخيار»؟!! والله نخشى من كثر «الفتاوى» حقت «بتوع ربنا»- توصلنا الى هذا الحد من التوهان والعنبصان.. والدين منها براء!!

تشتوا مني الأمانة.. وقول الصدق والكلام الجد- اقول «الشي لما يزيد عن حده ينقلب ضده» وصحاب الفتاوى «خوتنا في الله» يبان كثّروا بها زايد على اللازم.. نصتبح على فتوى «ضرع البقرة» ونتغدى على فتوى لا «ولاية» للنسانة في الدنيا.. ونتعشى على فتوى حرام تترشح «الحرمة» في الانتخابات - بس مسموح لها ان تنتخب بحسب الشرع.. أيوه تمام- بس تنتخب- الترشح «عيب» من عمل الشيطان.. طيب جينا معاكم.. شوه عاد باقي معاكم.. اليوم خارجونا.. ماشي وقت الانتخابات على الابواب!! يكفي المرأة فخراً.. ان «ابو احمد» .. انتصر لها.. وهذا بيت القصيد؟!
(22 مايو)