المؤتمرنت - أعلن الناقد الفني طارق الشناوي مقاضاة الفنان مصطفى قمر، على إثر أزمتهما الأخيرة بعد هجوم قمر عليه لانتقاده فيلمه الأخير أولاد حريم كريم.

واعتبر طارق الشناوي أن رد مصطفى قمر بهذا الشكل يعتبر سب وقذف يؤدي إلى السجن، مؤكدًا أنه لن يسكت عن حقه ولن يتنازل حتى لو اعتذر له.

وقال طارق الشناوي في لقائه مع إي تي بالعربي: فيه سب وقذف علني واللي هياخد الإجراء ده مش أنا.. نقابة الصحفيين لأنها جزء من المنظومة اللي بتحافظ على حرية التعبير، وبجانب الإجراء النقابي هيكون فيه إجراءات قانونية من خلال النقابة أيضا، وبقول للصحافة بلاش يقولوا ردا على هجوم لأني ما هاجمتش أنا انتقدت فيلم فاتشتمت علشان كده هاخد حقي بالقانون.

وتابع طارق الشناوي: هو بيشتم والتعبيرات دي بتدينه قدام الرأي العام والقانون ومش هتنازل عن حقي حتى لو اعتذر، لأن ده سب وقذف علني يؤدي إلى السجن وهفضل ورا القانون ولازم يعاقب على حالة الانفلات اللي هو فيها لأن مهما كان حالة الهزيمة اللي بيعشها لا يبرر له مهاجمتي.

واستكمل: كل اللي قلته يقع تحت سقف حرية النقد حتى كلمة رديء واحدة من التقييمات للأفلام، وكلمة المطرب فقد بريقه يقع تحت إطار النقد، ولما قلت إن الفنانات اللي اشتركن معه مش مطلوبات في السينما ده مش تقليل ده تقيم واقعي مش شايف شيء في اللي قلته غلط.

وأضاف الشناوي ردًا على تصريحات مصطفى قمر الذي قال إنه لم انتقد فيلمه دون أن يشاهده، قائلًا: إزاي تحكم إني ما شفتش الفيلم، هل هو معايا 24 ساعة؟ ده من ضمن الأسلحة الفاسدة لأنها أسلحة مردود عليها لأن هرد عليه وأقول هل شاف أني ما شفتش الفيلم، ولو قلت راي إيجابي هيتقال أني شفت الفيلم؟.

كما نفى طارق الشناوي وجود خلافات سابقة بينه وبين مصطفى قمر مثلما زعم الأخير، قائلًا: لم التق باللي اسمه مصطفى قمر على الإطلاق في مكان وده ادعاء وسب وقذف لأنه عاوز يوحي أن حصل خلاف بينا وأن انتقادي لفيلمه تصفية حسابات.

تفاصيل أزمة مصطفى قمر وطارق الشناوي
وسبق أن انتقد طارق الشناوي فيلم أولاد حريم كريم ومصطفى قمر ووصف أن العمل لا يمت للسينما وأنه أسوأ الأفلام والأعمال الفنية، ووصف قمر بالمطرب الذي فقد بريقه وهو الأمر الذي رد عليه قمر وهاجمه بشدة.

من ناحيته، هاجم الفنان مصطفى قمر الشناوي قائلًا: هو أنا مش طلبت منك تبعد عني أصلًا وماتتكلمش عني علشان ماتتهزأش طيب أنت اللي جيبته لنفسك عموما ياللي اسمك طارق أنت كاتب كلام أهبل يدل للمرة المليون أنك ماشفتش الفيلم، وعموما اللي حيرد عليك جمهور السينما الحقيقي اللي دخل الفيلم اللي مالوش دعوة بالنفاق أو مصلحة أي فيلم تاني، فكرني كده شغلتك ايه، هي من أربع حروف بيتهيألي.

وقال مصطفى قمر في تصريحات تلفزيونية: ما قدرش أسيب واحد في المهنة متخصص يطلع يقول مصطفى قمر فاشل.. إحنا نجوم وبنمثل بلدنا بفننا المحترم الراقي، متسائلًا: المفروض أحفر تربة وأقولكم موتوني.. وهاخد حقي بالقانون من كل اللي غلط فيا؟

واضاف أن هناك خلافات سابقة بينه وبين طارق الشناوي وانتقاده له يعد تصفية حسابات، إذ قال: خلافي أنا وطارق الشناوي منذ 20 عامًا.. والأسلوب اللي اتبعه مش مهني.وكالات